(Казан, 29 сентябрь, «Татар-информ»). Октябрь аенда Казаннан Антальяга яңа чартер рейслары ачыла. Бу хакта Татарстан башкаласы аэропортының матбугат хезмәте хәбәр итә. 1 октябрьдән Azur Air авиакомпаниясе Антальяга туристик рейсларының чартер программасын арттырачак. Программа «язгы-җәйге навигациясе ахырына (ул 24 октябрьдә төгәлләнә) кадәр дәвам итәчәк», дип искәрттеләр һава аланында. Авиакомпания октябрь аенда әлеге юнәлеш буенча барлыгы 37 рейс оештырырга ниятли. Башка төбәкләрнең туристлары өчен Самара, Пермь һәм Омскидан берничә рейс планлаштырылган. Моннан тыш, Azur Air авиакомпаниясе октябрь аенда Казаннан Бодрумга — өч һәм Даламанга дүрт рейс оештырырга җыена. Самолет Казаннан Антальяга өч сәгать ярымда барып җитәчәк. Чартер рейсларының расписаниесе самолет һавага күтәрелер алдыннан үзгәрергә дә мөмкин, дип искәрттеләр аэропортта. «Татар-информ» агентлыгы чит илдән кайткан россиялеләрнең вакытлыча карантинга озатылачагы хакында хәбәр иткән иде.
