Ermenistan bilen Türkiýäniň arasyndaky gury ýer serhedi 35 ýyldan soň ilkinji gezek şenbe güni açyldy - serhet nokadyndan Ermenistandan ynsanperwer kömegini alyp barýan bäş sany ýük maşyny geçdi. Olar Türkiýäniň günortasynda bolan ýer titremesinde ejir çekenlere kömek alyp barýarlar. Bu barada Azatlyk Radiosynyň Ermeni gullugy "Azatutyun" habar berdi.
Ermenistan (şol wagt SSSR-iň bir bölegi) bilen Türkiýäniň arasyndaky serhet geçelgesi 1988-nji ýylda Ermenistanyň Spitak şäherini weýran eden ýer titremesinden soň açylypdy. Soňra gumanitar ýükler Türkiýeden Ermenistana getirilipdi.
Birnäçe gün ozal 27 adamdan ybarat halas ediş topary Ermenistandan Türkiýä uçdy.
100 tonna azyk, derman, suw we beýleki zerur zatlary alyp barýan ýük awtoulaglary Adýaman şäherine gitdi. Ankaranyň ermeni-türk gepleşikleri boýunça ýörite wekili Serdar Kylyç ermeni kärdeşine, Ermenistanyň mejlisiniň başlygynyň orunbasary Ruben Rubinýana we Daşary işler ministriniň orunbasary Wahan Kostanýana minnetdarlyk bildirdi. Kylyç twitterde çap eden ýazgysynda"Ermenistan halkynyň ýer titremesinden ejir çekýän sebitdäki halkymyzyň ejirini ýeňletmek üçin iberen kömegini hemişe ýadymda saklaryn" -diýdi.
Türkiýe bilen Ermenistanyň arasyndaky gatnaşyklar hem taryhy sebäplere görä, hem-de Türkiýäniň Daglyk-Garabag üstündäki konfliktde Azerbaýjany goldaýandygy sebäpli dartgynly. Ermenistan, dünýäniň köp ýurtlary ýaly, Birinji Jahan Urşy döwründe ermenileriň Osman imperiýasyndaky gyrgynçylygyny genosid hasaplaýar, Türkiýe bu kesgitleme bilen ylalaşmaýar. Ýurtlaryň arasynda diplomatik gatnaşyk ýok, ozara serhedi ýapyk. Şol bir wagtyň özünde, Ankara we Ýerewan gatnaşyklary gowulandyrmak üçin gepleşik geçirýärler.
6-njy fewralda Türkiýäniň günorta-gündogarynda bolan ýer titremesinde ölenleriň sany 28 000-den geçdi. Türkiýäniň wise-prezidenti Fuat Oktaý şenbe güni geçirilen metbugat ýygnagynda Türkiýede ölenleriň sanynyň 24 617-e ýetendigini aýtdy. "Siriýanyň raýat goranyş" toparynyň maglumatyna görä, Siriýada tassyklanan adam ýitgisiniň umumy sany 3575 adam bolup, olaryň 2167-si gozgalaňçylaryň gözegçiligindäki ýerlerde heläk boldy.
Bu sanlar her sagat köpelýär - harabalyklarda agtaryş işleri dowam edýär. Harabalygyň aşagynda diri galanlary tapmak umydy az bolsa-da, diri galanlar ýer titremesinden bäş gün geçensoň hem şenbe güni tapyldy. Hususan-da, Gaziantep welaýatynda bäş adamdan ybarat tutuş maşgala halas edildi.
Umumy sanlara görä, şenbe güni harabalykdan 10-dan gowrak adamyň halas edilendigi mälim boldy, olaryň köpüsi çagalar. Iki gyzyň Azerbaýjandan baran bir topar tarapyndan halas edilendigi aýdylýar& Azerbaýjanyň Adatdan daşary ýagdaýlar ministrliginiň 700-den gowrak işgäri Türkiýä iberildi.