Дар заминаи куштори рӯзноманигор Ҷамол Хошуқҷӣ Ийолоти Муттаҳидаи Амрико таҳрим ҷорӣ кард. 17 табааи Арабистони Саудӣ дар чаҳорчуби "қонуни Магнитский" таҳти маҳдудиятҳои молӣ қарор гирифтанд. Ба ин гурӯҳ консули генералии Арабистони Саудӣ дар Истамбул ва собиқ мушовири валиаҳд Муҳаммад бин Саломон шомил шудаанд. Вазорати молияи Амрико ин нафаронро узви "тими амалиёт"-и маҳви Ҷамол Хошуқҷӣ унвон кард.
Дар ҳамин ҳол Додситони Арабистони Саудӣ барои иштирокчиёни куштори рӯзноманигор ҳукми қатл талаб кард. Дар ин бора хабаргузории Reuters рӯзи панҷшанбе гузориш дод. Додситон дар нишасти хабарии Риёз гуфт, ин панҷ нафар, баъди он ки намояндагони салтанат дар гуфтушунид бо онҳо номуваффақ шуданд, ба заҳролуд ва сипас пора кардани ҷасади Хошуқҷӣ амр доданд.
Хабарнигори Саудӣ Ҷамол Хашуқҷӣ, ки аз мунаққидони ҳукумат ҳисоб мешуд, рӯзи 2 октябр дар қаламрави консулгарии Саудӣ дар Истамбул кушта шуд.
