د کاپ ۲۹ په نوم په اذربایجان کې د اقلیم په اړه د ملګرو ملتونو د اقلیم غونډه په اضافي وخت او وروسته له دې چې د خبرو د ناکامېدو احتمال مطرح شو، د ۳۰۰ میلیارد ډالري موافقې په تصویب سره پای ته ورسېده.
د دې هوکړې له مخې، چې د یکشنبې په سهار د لیندۍ څلورمه نېټه تصویب شوه، شتمن هېوادونه ژمن شول چې تر ۲۰۳۵م کال پورې له اقلیمي بدلونونو سره د مبارزې لپاره پرمختیايي هېوادونو ته هر کال لږ تر لږه ۳۰۰ میلیارد ډالره مرسته وکړي.
د باکو غونډه، چې دوې اوونۍ وړاندې پیل شوې وه، د بودیجې پر سر د اختلاف له زیاتېدو وروسته د شنبې تر ورځې وغځېده.
د شنبې په ماښام، د غونډې له تالاره د څو هېوادونو د استازو له غوسه وتلو وروسته، د هوکړې د ناکامۍ احتمال زیات شو، خو د یکشنبې په سهار اعلان وشو چې ۳۰۰ میلیارد ډالري هوکړه تصویب شوه.
شتمنو هېوادونو په لومړیو کې د ۲۵۰ میلیارد ډالرو وړاندیز وکړ، خو بېوزلو هېوادونو د یو ټریلیون ډالرو غوښتنه کوله.
د کاپ ۲۹ غونډې پر مهال د شتمنو هېوادونو، چې په کې د امریکا متحدهایالات او اروپايي اتحادیه شامل دي او د نورو هېوادونو تر منځ اختلافات موجود وو.
د فرانسې خبري آژانس د راپور له مخې، سره له دې چې انتقادونه او اندیښنې موجودې وې، د کاربن د اندازې د بدلولو پر سر موافقه یو لوی پرمختګ ګڼل کېږي.
دا موضوع له کلونو راهیسې په اقلیمي مذاکراتو کې مطرح ده.
رویټرز خبري آژانس وايي چې نړۍ نژدې لس کاله د کاربن لپاره د مقرراتو د جوړولو هڅې وکړې او په پای کې په دې برخه کې یوې موافقې ته ورسېده.
رویټرز یادونه کړې چې ۳۰۰ میلیارده ډالر تر هغه څه لږ پیسې دي چې بېوزلو او لږ پرمختللو هېوادونو یې تمه لرله.
د کاپ ۲۹ اقلیمي غونډه په داسې حال کې ترسره شوه چې سپینې ماڼۍ ته د ډونالډ ټرمپ ستنېدو ته لږ وخت پاتې دی او له همدې کبله د شوې موافقې په اړه شکونه زیات شوي دي.
ټرمپ ویلي چې امریکا به له نړیوالو اقلیمي هڅو څخه وباسي.
هغه همداراز کریس رایټ د امریکا د انرژۍ وزارت لپاره د خپل نوماند په توګه معرفي کړی چې د تېلو یو مدیر او د فوسیل سون توکو پلوی دی او د اقلیمي بدلون پر ضد د مبارزې له طرحو سره یې مخالفت څرګند کړی دی.
