Saka til Julianne Snekkestad, ekskjærasten til Marius Borg Høiby, vert etterforska som vald i nære relasjonar.
Det stadfestar hennar bistandsadvokat Petter J. Grødem til NRK.
Snekkestad fekk førre veke status som fornærma.
Tidlegare tysdag opplyste òg John Christian Elden at hans klient Nora Haukland har fått status som fornærma. Saka hennar vert òg etterforska som vald i nære relasjonar.
Saka til Snekkestad og Haukland skal vere såkalla undersøkingssaker.
Denne koden brukast i saker der politiet førebels ikkje har nok informasjon til å vurdere om det skal opprettast ei straffesak.
– Det at eit offer har status som fornærma, betyr ikkje at den som vert etterforska, er sikta, skreiv Elden til NRK.