Politiet måtte bruke tåregass og gummikuler for å stanse bråket under ein fotballkamp i Buenos Aires i natt. Ein person døydde og eit hundretal blei skadde.
Uroa oppstod då folk pressa på for å kome seg inn på dei allereie fullpaka tribunene under toppkampen mellom Boca Juniors og Gimnasia y Esgrima.
Då dei greidde å trenge gjennom portane, sprang tilskodarar ut på bana for å kome seg unna. Då var det spela ni minutt av kampen. Bilete viser spelarane i full fart mot garderobene for å kome seg vekk frå folkemassene og tåregassen.
– Det blei heilt umogeleg å puste, sa dommaren.
Ein 57 år gammal mann døydde av hjarteattakk under bråket.
