Казакстан парламенти мамлекеттик сырлар тууралуу мыйзамга киргизген өзгөртүүлөргө ылайык, мурдагы президенттердин жана алардын үй-бүлө мүчөлөрүнүн жеке жашоосу менен саламаттыгы тууралуу маалыматтар жашыруун болот.
Мажлис кабыл алган документти парламенттин Жогорку палатасы Сенат жактырды. Эми ал президенттин кол коюусуна жөнөтүлөт.
“Казакстанда ар бир жаран жеке жашоосун каалагандай жүргүзүүгө акысы бар. Бул саламаттык көйгөйлөрүнө жана диагноздорго байланыштуу. Көп өлкөлөрдө президенттердин саламаттыгы тууралуу маалымат конфиденциалдуу болуп саналат”, - дейт депутат Айгүл Капбарова.
Азыр Казакстанда бир гана экс президент бар - ал Нурсултан Назарбаев. 2019-жылдын мартында бийликти Касым-Жомарт Токаевге өткөрүп бергенде кеңири ыйгарым укуктарын сактап калган.
2022-жылкы Январь окуяларынан кийин ал “Элбашы” макамынан, өмүр бою Коопсуздук кеңешин жетектөө укугунан ажыратылган. Ошондой эле калкка кайрылууга жана мамлекеттик мекемелерге жана бийлик өкүлдөрүнө өз демилге-сунуштарын айтууга тыюу салынган.
84 жаштагы Назарбаев 2023-жылы операция болгонун маалымат каражаттары жазышкан. Жубайы Сара экөөнүн үч кызы - Дарика, Динара жана Алия бар. 2023-жылы жарык көргөн мемуарында Асель Исабаевадан эки уулу бар экенин ачыктаган.
