Жогорку Кеңештин депутаты Камила Талиева мугалимдерге ноутбук сатып алуу маселеси боюнча депутаттык иликтөө жүргүзүү талабын койду. Депутат бул тууралуу парламенттин 28-ноябрдагы отурумунда айтып, ноутбук сатып алуу боюнча документтер колуна тийгенин билдирди.
"Министрлер кабинетинин жарлыгы өзү туура эмес жазылган, ноутбуктар качан алынышы да көрсөтүлбөгөн. Финансы министрлигинин, Экономика министрлигинин жана башка бир катар министрликтердин каршылыгына карабай, бир топ алешемдиктер кетиптир. Бул барып акыр түбү баягы "аттиш операциясына" барып калмак экен. Президент өз учурунда туура, алдын алуучу жаза колдонду. Муну акыр аягына чыгарып, иликтеп коюшубуз керек. Коорупциялык схема түзүү менен алуу аракети болуп калганбы? Муну депутаттар дыкат карайлы", - деди Талиева.
26-ноябрда президент Садыр Жапаров Билим берүү жана илим министрлиги тарабынан орто мектептердин мугалимдери үчүн ноутбуктарды сатып алууда жүктөлгөн эмгек милдеттерин тийиштүү түрдө аткарбагандыгы үчүн министрлер кабинетинин төрагасы Акылбек Жапаровго, анын орун басары Эдил Байсаловго, билим берүү жана илим министри Догдуркүл Кендирбаевага, министрликтин санариптик өнүктүрүү боюнча орун басары Лира Самыкбаевага сөгүш берилди. Буга мугалимдерге сапатсыз ноутбуктар сатып алуу негиз болгон.
Садыр Жапаров июль айында Кыргызстандын орто мектептеринин бардык мугалимдерин ноутбук менен камсыздоо тапшырмасын берген. Ноутбуктарды чогултуу боюнча “Кыргызиндустрия” мекемеси менен келишим түзүлгөн. Садыр Жапаров билим берүү жана илим министрине мекемеден алынган ноутбуктардын техникалык талаптарга жооп беришин, сапатын жана баасын көзөмөлгө алууну тапшырган.
Догдуркүл Кендирбаева биринчи этапта STEM предметтери: математика, физика, химия, биология, информатика боюнча 24 миң 431 мугалим ноутбук менен камсыздаларын билдирген.
Бул максатта мамлекеттик бюджеттен 600 миллион сомдон ашык каражат бөлүнгөн. Жылдын аягына чейин мугалимдердин 50%, кийинки окуу жылы 100% ноутбук менен камсыздалары айтылган.(ZKo)
