Гонконгдун бийлиги кылмышкерлерди Бээжинге экстрадициялоону караган, калкты нааразы кылган мыйзам долбоорунан баш тартпайт.
Бул тууралуу Кытайга баш ийген Гонконг администрациясынын башчысы Кэрри Лам билдирди. Анын айтымында, бул мыйзам долбоору Гонконг эл аралык издөөдө жүргөн кылмышкерлер баш калкалоочу жай болуп калбашын көздөйт жана жалаң эле Кытайга эмес, башка мамлекеттерге да экстрадициялоону карайт.
Ал эми аталган мыйзам долбооруна каршы чыккандар Кытай бийлиги бул документти борбордук бийликти сындагандарды куугунтукташ үчүн колдонушу мүмкүн деп эсептешет.
Уюштуруучулардын айтымында, Гонконгдо жекшембиде өткөн каршылык акциясына бир миллиондой адам чыкты.
1842-жылдан бери Британиянын колониясы болуп келген Гонконг 1997-жылы Кытайдын башкаруусуна өзгөчө укуктары бар, демократияга жана эркиндиктерге кепилдик берилген атайын аймак катары өткөрүлүп берилген.
