Түркмөнстандын Лебап облусунда элди мажбурлап пахта талаасына чыгаруу уланууда. Бул тууралуу «Азаттык» радиосунун түркмөн кызматы аймактагы өз булактарына шилтеме кылып билдирди.
Булактын айтымында, пахта талааларына мугалимдер, дарыгерлер жана медайымдар дем алыш күндөрү чыгарылып жатат. Мындан тышкары аймактагы заводдор менен ишканалар дагы кызматкерлеринин бир бөлүгүн пахта теримге жөнөтүп турууга милдеттендирилген. «Октябрь жаңы гана башталды, бирок пахта дээрлик жокко эсе. Эгер пахта талааларына сырттан көз сала турган болсок, анда өтө сейрек кездешкен ак тактарды гана көрүүгө болот», - деди булак.
Аты-жөнүн айткысы келбеген жергиликтүү тургундун бири пахта тапшыруунун бир күндүк нормасы бирдей эмес экенин, ал ар бир жетекчи тарабынан өзүнчө белгилене турганын айтты.
«Адатта күнүнө 30-50 килограммдан пахта тапшырууну талап кылышат. Бирок бул талапты аткаруу мүмкүн эмес. Кээ бирде күн бою араң 5 килограмм чогулткандар болот», — деди ал. Анын пикиринде, жетекчилер деле мамлекеттик планды аткаруу мүмкүн эмес экенин түшүнүп турушат.
«Район башчыларынын башкы максаты — адамдарды пахта талаасына чыгарганын көрсөтүү. Алар күн сайын жогорку жактагы жетекчилерине талаага канча киши чыккандыгы тууралуу маалыматтарды жөнөтүп турушат», — деди ал.
Бул маалыматтарды Лебап облустук акимчилигинде иштеген кызматкерлердин бири дагы ырастады. Анын айтымында, адамдарды мажбурлап талаага чыгаруу президент пахта чогултуу планы аткарылганын жарыяламайынча уланат. Жергиликтүү тургундар пахта талаасына чыга албагандар өзүнүн ордуна башка жумушчуларды жалдап иштетүү үчүн 20 манаттан (расмий курс боюнча 3,5 манат 1 долларга барабар) төлөшү керек экенин кошумчалашты.
