Бул тууралуу Ереванда 11-апрелдин кечинде расмий жарыяланды.
Армениянын Республикалык партиясынын өкүлү, парламенттин вице-спикери Эдуард Шармазановдун билдиргенине караганда, партиянын аткаруучу органы премьер-министрликке мурдагы президент Серж Саркисяндын талапкерлигин алып чыгуу маселесинде “биримдигин жана тилектештигин” көргөздү.
2015-жылдагы конституциялык реформадан кийин Арменияда премьер-министрдин ыйгарым укуктары кеңейтилип, президенттики тескерисинче азайган эле.
Өлкөнүн мурдагыдай жалпы эл эмес, парламент шайлаган президенти Армен Саркисян 9-апрелде кызматка киришти.
Акыркы күндөрү Ереванда мурдагы президент Серж Саркисяндын бийликке кайтып келишине каршы “Сержди кабыл алба ” деген топко бириккен активисттердин нааразылык акциялары да өтүп жатты. Кечээ алар башкаруучу партиянын кеңсеси жайгашкан жолду жарым саатча бууп да турушту.
Армениянын парламенти жаңы премьер-министрди 17-апрелде шайлаары күтүлүүдө. (UE)
