Талдықорған қалалық соты Қаңтар оқиғасы кезінде Алматы облысы департаменті ғимаратынан "қару-жарақ ұрлады" деп айыпталған алты адамды үш жыл бостандығынан айырып, қатаң режимдегі колонияға жіберді. Бұл туралы 25 қыркүйекте Жетісу облысы сотының баспасөз қызметі хабарлады.
Хабарда сотталушылардың аты-жөні, жасы көрсетілмеген. Соттың мәліметінше, екі адам дүрбелең кезінде полиция ғимаратынан атыс қаруы мен оқ-дәрі ұрлаған және оны сатпақ болған. Сатып алушыларды іздеуге тағы төрт адам қосылған. Оның екеуі "сатып алушымен" кездесіп, миллион теңгеге екі автомат пен оғы бар карабин ұсынған. Сот ақпаратына қарағанда, сатып алушы қауіпсіздік күштерінің арнайы агенті болған.
Сот үкімі әлі заңды күшіне енген жоқ.
Қыркүйек айының басында Тараз қаласының соты үш полиция қызметкерін төрт жылға бостандығынан айырып, төртіншісіне рақымшылық жасады, тағы біреуі іс-әрекетінде "қылмыстық құқықбұзушылық болмауына" байланысты ақталды. Ақпаратқа қарағанда, сот 2022 жылы 6 қаңтарға қараған түні Жамбыл облысының полиция басқармасы мен полиция департаменті ғимаратына шабуыл жасалғаны анықталған. Ішкі істер органдарындағы лауазымды адамдардың әрекетсіздігінен тапанша, оқ-дәрі және арнайы құралдар "ұрланып, жоғалған", салдарынан мемлекетке ірі көлемде материалдық залал келген" деп хабарлады Тараз қаласы №2 сотының баспасөз қызметі.
Бұл үкімдер кемінде 238 адамның өмірі қиылған Қаңтардағы қантөгістен кейін екі жылға жуық уақыт өткенде шығарылды. Қаңтардағы дүрбелеңнен кейін көп ұзамай ІІМ мен ұлттық қауіпсіздік комитетінің үш жоғары лауазымды өкілі түрлі жағдайда өлді.
Қаңтар оқиғасынан соң Кәрім Мәсімов "мемлекетке опасыздық жасады", "билікті күшпен басып алмақ болды" және "қызметін асыра пайдаланды" деген айыппен 18 жылға бостандығынан айырылды. Оның орынбасары Әнуар Садықұлов 16 жылға, Дәулет Ерғожин 15 жылға, Марат Өсіпов 3 жылға сотталды. "Мемлекеттік құпия мәліметтер қаралады" деген себеппен сот жабық өтті.
Бас прокурор Берік Асылов 2023 жылы 5 қаңтар күнгі мәжілістің жалпы отырысында Қаңтар оқиғасына дайындық жыл бойы жүргізілген деп мәлімдеді. "Тергеу мәліметі бойынша, 5 қаңтарда Кәрім Мәсімов пен орынбасарларының тапсырмасы бойынша, Алматы, Қызылорда және Алматы облыстарының ұлттық қауіпсіздік комитеті департаменттерінің жеке құрамы жұмыс орындарын тастап кеткен" деді Асылов.
2023 жылы 28 сәуірде Алматы облысы полиция департаментінің бұрынғы басшысы Серік Күдебаев Қаңтар оқиғасынан кейінгі азаптаулар кезінде қызмет өкілетін асыра пайдаланды деген айыппен 10 жылға сотталды. Тергеу материалдарына қарағанда, Күдебаев Қаңтар оқиғасы кезінде "полиция департаментінің ғимаратын тастап кеткен.
