მას შემდეგ, რაც შინაგან საქმეთა სამინისტრომ პარლამენტთან მიმდინარე საპროტესტო დემონსტრაციის დაშლა წყლის ჭავლის გამოყენებით დაიწყო პარლამენტის გვერდითა, ჭიჭინაძის ქუჩაზე, პოლიციელები რუსთაველის გამზირზეც გადავიდნენ.
პოლიცია აგრძელებს წყლის ჭავლის გამოყენებას.
თბილისში ჰაერის ტემპერატურა 5°C-ია. ქრის ქარი.
iPhone-ის ამინდის აპლიკაციის თანახმად, ისე ცივა, როგორც -1°C-ის პირობებში.
პოლიციამ 02:40 საათისთვის რუსთაველის გამზირზე მობილიზებულ სასწრაფო დახმარების მანქანებს მოუწოდა, დატოვონ ტერიტორია.
პოლიცია ალექსანდრეს ბაღის ჩასასვლელშიც დგას. დემონსტრანტთან ნაწილი ქაშუეთის ეკლესიის ეზოში და მიმდებარედ რჩება.
დაშლას წინ უძღოდა პოლიციასა და დემონსტრანტებს შორის ჭიჭინაძის ქუჩაზე რამდენიმესაათიანი დაძაბულობა და შიგადაშიგ დაპირისპირება.
პოლიცია სპეც. საშუალებებს, სავარაუდოდ, წიწაკის სპრეის იყენებდა დემონსტრანტების წინააღმდეგ.
დემონსტრანტების მხრიდან პოლიციის მიმართულებით ისროლეს კვერცხები და სხვადასხვა საგანი.
დემონსტრანტები და პოლიცია ერთმანეთს აგინებდნენ.
პოლიციელებმა ფიზიკურად იძალადეს რამდენიმე ადამიანზე.
