საქართველოს თავდაცვის ყოფილი მინისტრი თინა ხიდაშელი საპროტესტო დემონსტრაციების ფონზე აცხადებს, რომ „ქართულმა ჯარმა ხალხი უნდა დაიცვას“.
„მოქმედების დროა დღეს. საქართველოს უახლესი ისტორია იწერება დღეს. ქართულმა ჯარმა ხალხი უნდა დაიცვას, საკუთარი მოსახლეობა და სამშობლო“, - წერს იგი ფეისბუკზე.
ხიდაშელის თქმით, „ახლა კეკლუცის დრო არ არის - ან ვიბრძოლებთ ჩვენი ხვალინდელი დღისთვის, ან ამ თაობის ქართველებისთვის თავისუფლების კარი ჩაირაზება“.
„ამასობაში ამ ბრძოლას სტრუქტურა და ორგანიზება სჭირდება, არა უბრალოდ ლიდერი, ორატორი, არამედ ორგანიზებული წინააღმდეგობა. ფართო ფრონტი და დისციპლინა. ამ ბრძოლაში გამოიძერწება ქვეყნის ევროპული მომავლისკენ წამყვანი პოლიტიკური ძალა და ლიდერიც! ა ბურთი, ა მოედანი“, - წერს ის.
თინა ხიდაშელი საქართველოს თავდაცვის მინისტრი იყო 2015-2016 წლებში, - ის „ქართული ოცნების“ კოალიციაში შემავალი „რესპუბლიკური პარტიის“ წევრი იყო.
ამჟამად იგი არის კვლევითი ორგანიზაცია „სამოქალაქო იდეის“ დამფუძნებელი.
28-29 ნოემბერს სპონტანური საპროტესტო აქცია მოჰყვა პრემიერ-მინისტრის, ირაკლი კობახიძის განცხადებას, რომ საქართველოს ხელისუფლება „უარს ამბობს 2028 წლის ბოლომდე ევროკავშირთან მოლაპარაკების გახსნაზე“.
„დღეს მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი. ასევე, 2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან“, - განაცხადა კობახიძემ.
ოპოზიციამ „ოცნების“ ეს გადაწყვეტილება შეადარა 2013 წელს უკრაინის მაშინდელი პრეზიდენტის, ვიქტორ იანუკოვიჩის გადაწყვეტილებას, უარი ეთქვა ევროკავშირთან ასოცირების ხელშეკრულების ხელმოწერაზე, - რასაც „ღირსების რევოლუცია“ მოჰყვა.
სპონტანური, დაუგეგმავი დემონსტრაციის მონაწილეებთან საღამოს მივიდა პრეზიდენტი სალომე ზურაბიშვილი, - რომელიც ცოტა ხნით ადრე დიპლომატიურ კორპუსსა და ოპოზიციას შეხვდა.
აქციის მონაწილეებთან შეხვედრის შემდეგ ის შსს-ის სპეციალური დანიშნულების ძალებისკენ წავიდა და მიმართა: „თქვენი მოვალეობაა, რომ დაიცვათ ამ ქვეყნის სახელმწიფოებრიობა, დაიცვათ მოქალაქეები. თქვენი მოვალეობა არ არის, რომ დაშალოთ ხალხი. რუსეთს ემსახურებით თუ საქართველოს?“
მანამდე მან დაუმორჩილებლობისკენ მოუწოდა მოქალაქეებს: „არშეგუება, არდანებება, წინააღმდეგობა. მე ამის ერთგული ვიქნები ბოლომდე, როგორც თქვენ იქნებით ერთგული ბოლომდე“.
დაახლოებით დილის შვიდი საათისთვის, საპოლიციო ძალებმა თბილისში რუსთაველის გამზირი დაიკავეს და დემონსტრანტების დაკავება განაგრძეს რესპუბლიკის მოედანთან.
