რუსთავის საქალაქო სასამართლომ ცოლის და სიდედრის მკვლელობაში ბრალდებულ გიორგი ფირაშვილს უვადოდ თავისუფლების აღკვეთა მიუსაჯა. პროკურატურის მიერ გავრცელებული ინფორმაციით, სასამართლომ სრულად გაიზიარა ბრალდების მიერ წარდგენილი მტკიცებულებები.
ფირაშვილის ადვოკატმა გიორგი ძოწენიძემ რადიო თავისუფლებასთან მოკლე კომენტარში თქვა, რომ სასამართლოს გადაწყვეტილებას დადგენილ ვადაში სააპელაციო სასამართლოში გაასაჩივრებს.
შემთხვევაზე, რომელიც რუსთავში 2024 წლის 22 მაისს მოხდა, რადიო თავისუფლებაც წერდა.
მკვლელობამდე დაახლოებით ერთი საათით ადრე, მარიამ სოფრომაძე,ექვსი თვის შვილთან და ქმართან ერთად იყო კლინიკაში. კლინიკაში იყო მარიამის დედაც, თუმცა სხვა ექიმთან ვიზიტზე.
27 წლის გიორგი ფირაშვილმა ცოლი და ცოლის დედა კლინიკიდან დაახლოებით 300 მეტრში, რუსთავის ცენტრში, დუმბაძის ქუჩაზე, სავარაუდოდ, სახლისკენ მიმავლები სანადირო თოფით დახოცა. დედასა და ბებიასთან ერთად იყო ექვსი თვის ჩვილიც.
პროკურატურის თანახმად, “სასამართლო პროცესზე გამოკვლეული მტკიცებულებებით დადასტურდა, ბრალდებულმა მეუღლის და სიდედრის მიმართულებით, რომლებიც ჩვილ ბავშვთან ერთად ქუჩაში გადაადგილდებოდნენ, სანადირო თოფიდან არაერთხელ გაისროლა”, რის “შედეგად, მათ გულ-მკერდის არეში მძიმე ხარისხის დაზიანებები მიიღეს. ორივე მათგანი შემთხვევის ადგილზე გარდაიცვალა”.
გამოკვლეული მტკიცებულებებით ასევე დადასტურდა, რომ 2023 წლის აპრილიდან 2024 წლის 22 მაისამდე პერიოდში, ბრალდებული მეუღლეს გენდერის ნიშნით დისკრიმინაციის მოტივით, სისტემატურად ამცირებდა, აკონტროლებდა, ფსიქოლოგიურად და ფიზიკურად ძალადობდა მასზე.
პოლიციამ გიორგი ფირაშვილი 22 მაისს შემთხვევის ადგილზე დააკავა, დანაშაულის ჩადენის იარაღი, სანადირო თოფი კი, ნივთმტკიცებად ამოიღეს.
მას ბრალად ედებოდა სისხლის სამართლის კოდექსით გათვალისწინებული რამდენიმე დანაშაულის ჩადენა, მათ შორის ოჯახის ორი წევრის განზრახ მკვლელობა, ჩადენილი გენდერის ნიშნით და ისეთი საშუალებით, რომელიც განზრახ უქმნის საფრთხეს სხვის სიცოცხლეს და ჯანმრთელობას, და სისტემატური ფსიქოლოგიური და ფიზიკური ძალადობა.
ქალთა მიმართ ძალადობა გენდერული ნიშნით - ეს არის ქალის წინააღმდეგ მიმართულ ძალადობა იმის გამო, რომ ის ქალია.
2024 წლის პირველ რვა თვეში, საქართველოში რვა ქალი მოკლეს. 2024 წლის პირველ ექვს თვეში, შინაგან საქმეთა სამინისტრომ ოჯახში ძალადობის ფაქტებზე 4500-მდე შემაკავებელი ორდერი გამოსცა. ამავე პერიოდში, შინაგან საქმეთა სამინისტროს მიერ გამოქვეყნებული სტატისტიკის თანახმად, საქართველოში ოჯახში ძალადობის 5472 შემთხვევა აღირიცხა, მათ შორის ფიზიკური ძალადობის 1243 და ფსიქოლოგიური ძალადობის 4081 შემთხვევა.
*თუ ხართ ოჯახში ძალადობის მსხვერპლი ან ფლობთ ინფორმაციას ოჯახში ძალადობის შესახებ, დარეკეთ ნომერზე 112 ან 116 006.
