B კატეგორიის ტაქსებს მარჯვენასაჭიანი ავტომობილებით საქმიანობა 2022 წლამდე შეეძლებათ, - ამის შესახებ მთავრობის დღევანდელ სხდომაზე განაცხადა დედაქალაქის მერმა კახა კალაძემ.
მისი თქმით, გადაწყვეტილება მიღებულ იქნა არსებული პანდემიისა და მისგან გამოწვეული ეკონომიკური პრობლემების გამო:
„B კატეგორიაში ჩვენ მარჯვენასაჭიან ავტომობილის მძღოლებს მივეცით ამ სერვისის განხორციელების შესაძლებლობა, თუმცა ეს იყო დროში შეზღუდული. ამის უფლება ჰქონდათ 2021 წლამდე. ახლა ყველას კარგად გვესმის არსებული რთული ვითარება, პანდემია, ეკონომიკური პრობლემები და გვინდა, რომ ეს უფლება 1 წლით გავუხანგრძლივოთ. B კატეგორიის მარჯვენასაჭიანი ავტომობილების მძღოლებს, კიდევ ერთი წლის ვადით, 2022 წლამდე ექნებათ შესაძლებლობა, გააგრძელონ თავიანთი საქმიანობა. ვფიქრობ, ეს ძალიან მნიშვნელოვანია მხარდაჭერისა და თანადგომის თვალსაზრისით“, - განაცხადა კახა კალაძემ.
თბილისის მერიის მიერ გატარებული რეფორმის შედეგად, ტაქსები დედაქალაქში A და B კატეგორიებად დაიყო. A კატეგორიის ტაქსი თეთრი ფერისაა და მგზავრის აყვანა შეუძლია როგორც ქუჩიდან, ისე ონლაინაპლიკაციის გამოყენებით; B კატეგორიის ტაქსი მხოლოდ ონლაინგამოძახების სერვისით მუშაობს და ფერის შეზღუდვა არ აქვს.
