ადგილობრივი აღმასრულებელი ხელისუფლების სურვილმა ოპოზიციის პროტესტი გამოიწვია. ოპოზიციის წარმომადგენლები მიიჩნევენ, რომ არჩევნების წინ კიდევ ერთი აიპის შექმნა ხელისუფლებას მხარდამჭერების დასაქმების და ამით ადმინისტრაციული რესურსის გაზრდის შანსს აძლევს, ეს ყველაფერი კი გორის ბიუჯეტის ხარჯზე ხდება. “ევროპული საქართველოს” წარმომადგენელი, დავით მახნიაშვილი, მიიჩნევს, რომ ახალ აიპში დასაქმებულ ადამიანებს ხელისუფლება საარჩევნოდ აამუშავებს.
საკრებულოს სხდომაზე ახალი აიპის შექმნას მხარს არ დაუჭერს “ნაციონალური მოძრაობა”. “მოძრაობის” წევრ ვასილისა ჯაბახიძის განცხადებით, უკვე მოქმედი აიპები დაკისრებულ მოვალეობას თავს ვერ ართმევენ და იქ დასაქმებული ადამიანებისთვის ბიუჯეტიდან ხელფასების სახით კოლოსალური თანხა იხარჯება. მისი აზრით, ყველაზე მასშტაბური აიპი, კულტურისა და ტურიზმის განვითარების სააგენტო, სადაც ასობით ადამიანია დასაქმებული, მნიშვნელოვან შედეგს ვერ აჩვენებს.
გორის მუნიციპალიტეტის მეთერთმეტე აიპი მუნიციპალური ტრანსპორტის მართვის საკითხებით იქნება დაკავებული. ჯერ არ არის ცნობილი, რამდენი ადამიანი დასაქმდება. პროექტი საკრებულოში რამდენიმე დღეში შევა. გორის საკრებულოს თავმჯდომარე, დავით რაზმაძე, ოპოზიციის ბრალდებებს უსაფუძვლოდ მიიჩნევს და აცხადებს, რომ ტრანსპორტის სააგენტოს შექმნა აუცილებლობით არის გამოწვეული, რადგან ქალაქს ავტობუსები აჩუქეს და ამ ტრანსპორტს მოვლა და მართვა სჭირდება.
გორის მუნიციპალიტეტის მერიის საზოგადოებასთან ურთიერთობის სამსახურის უფროსი, ელზა მიქელაძე, არ ამბობს, აიპებში რამდენი ადამიანია დასაქმებული, რომლებიც მოსახლეობას გარკვეულ სერვისებს სთავაზობენ, თუმცა, მისი თქმით, ამ აიპების დასაფინანსებლად ბიუჯეტიდან 17 მილიონ ლარზე მეტია გამოყოფილი.
გორის 38-მილიონლარიანი ბიუჯეტიდან ნახევარი აიპებზე იხარჯება, აქედან დიდი ნაწილი სახელფასო ფონდია. დასაქმებულია რამდენიმე ათასი ადამიანი. უკვე ცნობილია, რომ მეთერთმეტე გაერთიანების შექმნას მმართველი პარტია, უმრავლესობით, საკრებულოში მხარს დაუჭერს, ოპოზიცია კი ამ საკითხს საკრებულოს სხდომაზეც გააპროტესტებს.
