რუსეთის პრეზიდენტი, ვლადიმირ პუტინი 21 აგვისტოს მეზობელ ფინეთს სტუმრობს და მოლაპარაკებას მართავს ფინეთის პრეზიდენტთან, საული ნიინისტიესთან. ფინეთის პრეზიდენტის ოფისის წინასწარი განცხადებით, ჰელსინკიში გამართული მოლაპარაკების მთავარი თემები იქნება საერთაშორისო და ორმხრივი ურთიერთობების მიმდინარე საკითხები.
გამოცხადდა, რომ პუტინის ვიზიტთან დაკავშირებით ფინეთის დედაქალაქის ცენტრში და აეროპორტის გზაზე დროებით შეიზღუდება საავტომობილო მოძრაობა.
პუტინი და ნიინიესტიე რეგულარულად მართავენ შეხვედრებს. პუტინი ფინეთს გასულ წელსაც ეწვია, ამ დროისათვის ბოლო ორმხრივი შეხვედრა კი გაიმართა აპრილში, სანკტ-პეტერბურგში, არქტიკის ფორუმის კულუარებში.
პრეზიდენტის სასახლეში მოლაპარაკების შემდეგ, ორი ლიდერი ერთობლივ პრესკონფერენციას გამართავს. ნიინიესტიე პუტინის პატივსაცემად სადილსაც უმასპინძლებს.
ფინეთი ამჟამად ევროკავშირის მორიგე პრეზიდენტი ქვეყანაა. ის არ არის ნატოს წევრი, თუმცა ალიანსთან თანამშრომლობს პარტნიორობის და მშვიდობის პროგრამაში და ავღანეთის მისიაში.
