თელავის მერიის თანახმად, ტერიტორია, რომელზეც გაერთიანებული ოპოზიცია 16 დეკემბერს აქციის ჩატარებას აპირებს, ინაუგურაციისთვის საჭირო ტერიტორიაში ექცევა. ამიტომ გაერთიანებულ ოპოზიციას თელავის მერიამ შესთავაზა აქცია ალტერნატიულ ადგილას, კერძოდ, კოსტავას ქუჩაზე გამართოს.
როგორც თელავის მუნიციპალიტეტის მერი, შოთა ნარეკლიშვილი განმარტავს, ოფიციალური შეტყობინება აქციის ალტერნატიულ ტერიტორიაზე გამართვის შეთავაზების შესახებ უკვე გაეგზავნა გაერთიანებულ ოპოზიციას.
გაერთიანებული ოპოზიცია თელავში აქციის გამართვის ადგილის შეცვლას არ აპირებს-ამის შესახებ კი "ინტერპრესნიუსს" "ნაციონალური მოძრაობის" პარტიის თელავის რაიონული ორგანიზაციის ხელმძღვანელმა, გიორგი ბოტკოველმა განუცხადა.
"ის ადგილი, რომელსაც მერია გვთავაზობს, ყოვლად მიუღებელია, რადგან ეს არის ვიწრო ქუჩა და ძალიან არის მოშორებული ტერიტორიიდან, სადაც ჩვენ გვინდოდა აქციის გამართვა. წერილში წერია გაუგებარი რამ, რაც მერიის კომპეტენციაში არ შედის, რომ ის ადგილი, სადაც აქცია უნდა გაგვემართა, გამოყენებული უნდა იქნას მიმდებარე ტერიტორიის დაცვისთვის. მივმართავთ მერს და ხელისუფლებას, ჩვენ ვაპირებთ, რომ მშვიდობიანი საპროტესტო აქცია გავმართოთ ზუსტად იქ, სადაც თავიდან მოვითხოვეთ. პროცედურა ითვალისწინებს, რომ ამ შემთხვევაში აცნობო მერიას, ჩვენ ასეც გავაკეთეთ, ვაცნობეთ საპატრულო პოლიციას, მერიას, საგანგებო სიტუაციების სამსახურს, რომ აქცია გაიმართება იქ, სადაც იგეგმებოდა. პირიქით, მოვუწოდებთ მათ, რომ უზრუნველყონ სიმშვიდე. ჩვენ ვაპირებთ მშვიდობიან მანიფესტაციას“, - აღნიშნა გიორგი ბოტკოველმა.
16 დეკემბერს გაერთიანებული ოპოზიცია სალომე ზურაბიშვილის ინაუგურაციის პარალელურად მშვიდობიანი აქციის გამართვას თელავში გეგმავს.