რუსეთისა და ამერიკის შეერთებული შტატების პრეზიდენტების, ვლადიმირ პუტინისა და დონალდ ტრამპის ოფიციალური შეხვედრა არ შედგება მანამ, სანამ რუსეთი არ გაათავისუფლებს ქერჩის სრუტეში დაკავებულ უკრაინულ გემებსა და მათ ეკიპაჟებს-განაცხადა ამერიკის შეერთებული შტატების პრეზიდენტის მრჩეველმა ნაციონალური უსაფრთხოების საკითხებში, ჯონ ბოლტონმა.
ორი პრეზიდენტის შეხვედრა „დიდი ოცეულის“ ქვეყნების სამიტის ფარგლებში იგეგმებოდა არგენტინის დედაქალაქში, თუმცა ამერიკის შეერთებული შტატების პრეზიდენტმა იგი შეხვედრამდე ორი დღით ადრე გააუქმა. ამის მიზეზი გახდა უკრაინის სამხედრო გემების დაკავება შავ ზღვაში. ამერიკის შეერთებული შტატების სახელმწიფო დეპარტამენტმა რუსეთი საერთაშორისო სამართლის დარღვევაში დაადანაშაულა.