ავლაბარში, მეტეხის ქუჩა #14-ში ავარიული სახლის ნაწილი ჩამოიშალა. შემთხვევის შედეგად არავინ დაშავებულა. როგორც დედაქალაქის მერიის მიერ გავრცელებულ განცხადებაში ვკითხულობთ, სახლის ეტაპობრივი ჩამოშლა სამი დღის წინ დაიწყო, რაზეც ისნის რაიონის გამგეობამ რეაგირება მალევე მოახდინა. სახლის ჩამოშლილ ნაწილში მცხოვრები სამი ოჯახი, უსაფრთხოების მიზნით, დროებით საცხოვრებელში გადავიდა. გამგეობა მათ ბინის ქირით უზრუნველყოფს.
მერიის ინფორმაციით, უკვე რამდენიმე დღეა ადგილზე სპეციალისტები მუშაობენ და სახლის მდგომარეობას იკვლევენ. მას შემდეგ რაც სპეციალური კვლევის შედეგები იქნება ცნობილი, დედაქალაქის მერია გადაწყვეტილებას მიიღებს, სახლის ეს ნაწილი რა სახით უნდა აღდგეს.
მეტეხის ქუჩა #14-ში მთლიანობაში 30 ოჯახი ცხოვრობს, თუმცა, მერიის ინფორმაციით, მათ საფრთხე არ ემუქრებათ, რადგან სახლის დანარჩენი ნაწილი კონსტრუქციულად მდგრადია. ამ ეტაპზე, მიმდინარეობს გაწმენდის სამუშაოები.
