კრემლი აცხადებს, რომ რუსეთის პრეზიდენტმა ვლადიმირ პუტინმა კვლავ დმიტრი მედვედევი წარადგინა პრემიერ-მინისტრის პოსტზე. მანამდე ცოტა ხნით ადრე მედვედევმა, ისევე როგორც მისი კაბინეტის წევრებმა, პრემიერ-მინისტრის თანამდებობა დატოვა, რადგან რუსეთის კონსტიტუციით, მთავრობას უფლებამოსილება უწყდება ახლადარჩეული პრეზიდენტის ინაუგურაციის შემდეგ. შესაბამისად, 7 მაისს, პრეზიდენტ პუტინის მიერ ფიცის დადებისთანავე მედვედევმა ხელი მოაწერა მთავრობის უფლებამოსილების შეწყვეტის განკარგულებას. მოსალოდნელია, რომ რუსეთის სახელმწიფო სათათბირო 8 მაისს განიხილავს მედვედევის კანდიდატურას და მხარს დაუჭერს მას. სათათბიროში დომინირებს მმართველი პარტია „ერთიანი რუსეთი“, რომლის თავმჯდომარეც 52 წლის მედვედევია. 2008-2012 წლებში ის რუსეთის პრეზიდენტიც იყო, რის შემდეგაც ამ პოსტს პუტინი დაუბრუნდა. რუსეთის მთავრობაში 9 ვიცე-პრემიერი და 22 ფედერალური მინისტრია.
