ԿԳՄՍ նախարար Ժաննա Անդրեասյանի նախագահությամբ տեղի է ունեցել Կրթության տեսչական մարմնի կառավարման խորհրդի հերթական նիստը։
Նիստի օրակարգում էր Կրթության տեսչական մարմնի գործունեության և ստուգումների 2025 թվականի տարեկան ծրագրերի, ԿՏՄ որակի բաժնի գործունեության 2025 թվականի տարեկան ծրագրի և 2024 թվականի 1-3-րդ եռամսյակների գործունեության կատարողականի գնահատման արդյունքների, ինչպես նաև ստուգումների ուղեցույցի հաստատումը:
Տեսչական մարմնի ղեկավար Վաղարշակ Մատիկյանը, ներկայացնելով ԿՏՄ գործունեության 2025 թվականի տարեկան ծրագրի նախագիծը, անդրադարձել է տեսչական մարմի 2024 թվականի ձեռքբերումներին՝ առանձնացնելով երեք հիմնական ուղղություն՝ մշակված նոր գործիքակազմի կիրառումը ստուգումների ընթացքում, ռիսկերի գնահատման նոր մեթոդաբանության առանձնահատկությունները և Կառավարության հավանությանն արժանացած ու ԱԺ-ի քննարկմանը ներկայացվելիք «Կրթության բնագավառի տեսչական վերահսկողության մասին» օրենքի նախագիծը։
ԿԳՄՍ նախարար Ժաննա Անդրեասյանն ընդգծել է նոր օրենքի ընդունման կարևորությունը՝ նշելով, որ դրա կիրարկումը տեսչական մարմնի համար նոր գործառույթներ կավելացնի։ Նախարարն առաջարկել է օրենքում անցումային դրույթներ սահմանել, ինչը հնարավորություն կտա տեսչական մարմնին նախապատրաստական անհրաժեշտ աշխատանքներ իրականացնել:
