Թուրքիայի հարավ-արևելքում տեղի ունեցած խոշոր երկրաշարժի զոհերի թիվը հասել է 29 605-ի, հայտնում է երկրի Արտակարգ իրավիճակների վարչություն, փոխանցում է ՏԱՍՍ-ը։
«Մահացածների թիվը 29 605 է, մեր քաղաքացիներից 147 934-ը երկրաշարժից տուժած շրջաններից տարհանվել է այլ նահանգներ»,- ասվում է հաղորդագրության մեջ։
Թուրքիայի հարավ-արևելքում գտնվող Ղահրամանմարաշ նահանգում փետրվարի 6-ին 9 ժամ ընդմիջումով 7,7 և 7,6 մագնիտուդ ուժգնությամբ երկրաշարժեր են տեղի ունեցել։ Ստորգետնյա ցնցումները, որին հաջորդել են հարյուրավոր հետցնցումներ, զգացվել են երկրի 10 նահանգում և հարևան երկրներում, որոնցից ամենաշատը տուժել է Սիրիան։