Ամերիկայի Միացյալ Նահանգները Մերձավոր Արևելքում հերթական անգամ «ցույց է տվել իր ուժը»՝ տարածաշրջան ուղարկելով երկու B-52H Stratofortress ռազմավարական ռմբակոծիչներ, գրում է topwar.ru-ն:
Դրանք առանց կանգառի թռիչք են իրականացրել ԱՄՆ-ից դեպի Մերձավոր Արևելք: Ստացված տվյալների համաձայն՝ ռմբակոծիչները օդ են բարձրացել Հյուսիսային Դակոտայում գտնվող Մինոտի ավիաբազայից և թռչել Ջիբրալթարի, Միջերկրական ծովի, Իսրայելի, Հորդանանի, Սաուդյան Արաբիայի և Պարսից ծոցի վրայով՝ ուղևորվելով Իրանի սահմաններից հարավ:
Որոշ շրջաններում ռմբակոծիչներին ուղեկցել են Իսրայելի, Սաուդյան Արաբիայի և Կատարի ռազմաօդային ուժերի կործանիչները:
Հիշեցնենք՝ սա ամերիկյան ռմբակոծիչների չորրորդ թռիչքն է Իրանի տարածաշրջանում՝ Վաշինգտոնի ու Թեհրանի միջև հարաբերությունների սրման ֆոնին: Առաջին երեք թռիչքներն իրականացվել են այս տարվա հունվարին, իսկ փետրվարին թռիչքներ չեն եղել:
Նկատենք, որ մարտի 5-ին Միացյալ Նահանգները երկարաձգել էր Իրանի նկատմամբ կիրառված պատժամիջոցները: Համապատասխան հրամանագիրը ստորագրել է ԱՄՆ նախագահ Ջո Բայդենը:
