Կանադան հաստատել է կորոնավիրուսի դեմ չորրորդ պատվաստանյութի՝ Janssen-ի օգտագործումը, որը մշակել է Johnson & Johnson ընկերությունը: Ի տարբերություն մյուսների, այս պատվաստանյութը պահանջում է ընդամենը մեկ դեղաչափի ներարկում, գրում է korrespondent.net-ը։
«Ինչպես բոլոր հակակորոնավիրուսային պատվաստանյութերի դեպքում, առողջապահության վարչությունը հաստատել է Janssen պատվաստանյութը՝ դրա անվտանգության, արդյունավետության և որակի անկախ և խիստ գիտական ուսումնասիրությունից հետո: Բոլոր տվյալները ուսումնասիրելուց հետո մենք եզրակացրել ենք, որ կան լուրջ ապացույցներ, որ այս պատվաստանյութի օգուտները գերազանցում են դրա հավանական ռիսկերը», - ասել են երկրի առողջապահության նախարարությունում:
Նշվում է, որ կառավարությունը թույլ է տվել պատվաստանյութն օգտագործել 18 տարեկանից բարձր բոլոր մարդկանց դեպքում։
Կանադան արդեն իսկ պատվիրել է պատվաստանյութի 10 միլիոն դեղաչափ և հնարավորություն ունի գնել ևս 18 միլիոնը: Պատվաստանյութերը կմատակարարվեն Եվրոպայում և ԱՄՆ-ում գտնվող Johnson & Johnson-ի հաստատություններից:
Թեստերը, որոնց մասնակցել է 44 հազար մարդ, ցույց են տվել, որ այս պատվաստանյութերի արդյունավետությունը մոտ 66 տոկոս է է, մինչդեռ Pfizer և Moderna պատվաստանյութերի դեպքում այդ ցուցանիշը կազմում է մոտ 95 տոկոս։
Ի տարբերություն մյուսների, Johnson & Johnson-ի պատվաստանյութը միայն մեկ դեղաչափ է պահանջում: Այն կարելի է պահել սովորական սառնարանում, որը հեշտացնում է դեղի տեղափոխումն ու տարածումը: