Բրիտանական Daily Mail պարբերականն անդրադարձել է Իտալիայում կորոնավիրուսի համավարակի հետևանքով 2 ամիս տևած կարանտինային ռեժիմի թուլացումից հետո սիրահար զույգերի հանդիպման հուզիչ լուսանկարներին, որոնք մեծ տարածում են գտել համացանցում։
Երկրում այս օրերին ինքնամեկուսացման ռեժիմի թուլացումից հետո մարդիկ դիմակներով սկսում են դուրս գալ փողոցներ, հանդիպել հարազատներին, գրկախառնվել, շփվել ու փորձել վերադառնալ իրենց բնականոն կյանքին։
Աղբյուրը, սակայն, մանրամասնում է, որ չնայած սահմանափակումների թուլացմանը՝ երկրում դեռևս օրական վարակման տասնյակ նոր դեպքեր են հայտնաբերվում, որոնցից շատերն ավարտվում են մահվան ելքով։
Իտալիայում գրանցվել է կորոնավիրուսով վարակման ընդհանուր 213 013 դեպք, որից 29 315-ը՝ մահվան ելքով։ Հիվանդությունից ապաքինվել է 85 231 մարդ։
Վերջին տվյալների համաձայն՝ ամբողջ աշխարհում կորոնավիրուսով ավելի քան 3 741 795 միլիոն մարդ է վարակվել, որից 258 837-ը՝ մահվան ելքով։ Վարակակիրների և մահվան դեպքերի թվով ԱՄՆ առաջին տեղում է, այնուհետև հաջորդում են Իսպանիան, Իտալիան, Մեծ Բրիտանիան, Ֆրանսիան, Գերմանիան, Ռուսաստանը, Թուրքիան։