Մեծ Բրիտանիայի արքայազն Հարին և Սասեքսի դքսուհի Մեգան Մարքլն այսօր տոնում են իրենց որդու՝ Արչի Հարիսոն Մաունթբեթեն Վինձորի ծննդյան մեկամյակը, գրում է Daily Mail-ը։
Մեծ Բրիտանիայի թագուհի Էլիզաբեթ 2-րդը, ինչպես նաև թագավորական ընտանիքի մյուս անդամները, այդ թվում՝ Քեմբրիջի դուքսը և դքսուհին, արքայազն Չարլզը և նրա կինն արքայազն Հարիի և Մեգան Մարքլի առաջնեկի՝ Արչիի ծննդյան օրվա կապակցությամբ շնորհավորական գրառումներ են կատարել սոցցանցերում։
«Շնորհավոր Արչի Մաունթբեթեն Վինձորի ծննդյան օրը: Նա այսօր մեկ տարեկան է դառնում։ Արչին թագուհու ութերորդ ծոռն է»,- ասված է միապետի պաշտոնական թվիթերյան էջում։
Քեմբրիջի դուքսն ու դքսուհին Քենսինգտոնյան պալատի իր պաշտոնական Instagram-ի օգտահաշվում գրել են.«Շնորհավոր Արչիի առաջին տարեդարձը»։
Աղբյուրը հայտնում է, որ Սասեքսի դուքսն ու դքսուհին մտադիր են իրենց որդու ծննդյան օրվա կապակցությամբ «օրգանական, առանց շաքարի տորթ» ուտել, լողալ լողավազանում, ինչպես նաև վերջին ամիսների ընթացքում առաջին անգամ տեսազանգով կապվել թագավորական ընտանիքի երեխաների հետ։
Նշենք, որ թագավորական զույգն ինքնամեկուսացել է Լոս Անջելեսի իր առանձնատանը։
