Нохчичуьрчу Дубай-Юьртахь вехачу Магомадов Сайд-Хьасанан шина берана 12 шо долчу Ясинна а, 11 шо долчу Илесна а догIу 441 864 сом алименташна охьадилла декхарейина Белгородан кIоштара Маркова Ольга.
Кхелан кхеташонехь билгалабьккхина ахчанан барам лоруш бу 2014-чу шарера схьа дуьйна, хIора берана баттахь 12 274 сом кхачош. Магомадовн искца 2014-чу шарахь шегара ненан бакъонаш дIаяьхначу Шела-кIоштан кхелан сацамна Марковас бина латкъам теллинера кхелехь.
Берийн дас бахарехь, 2014-чу шарахь дуьйна нана цаьрца ехаш яц, тIейогIуш яц, йа дола деш а яц. Берашна даха меттиг Магомадовца билгалбаьккхина кхело, ткъа цуьнгара ден бакъонаш дIайохуш бина сацам юхабаьккхина.
Кавказ.Реалиин корреспонденте Марковас дийцарехь, бераш лело а, цаьрца зIе дIатаса а цо бакъо къуьйсу бархI шо ду, амма Магомадовс дуьхьало латтайо цунна, берашна гергахь иза сийсазъеш. Къамелдинарг реза яц кхелан сацамна. Цуьнан ший а доьзалхо Австрехь вина ву, иза ша Нохчийчохь цкъа а хилла яц, ткъа къаьстинчул тIаьхьа, зудчо бахарехь, бераш лачкъийнера дас.
Австрин Брегенц гIалин кхелан сацамца Магамадовгара дIаяьхна ден бакъонаш, иза вара царна алименташ дала дезарг. И кхелан сацам кхочушбина цахиларца, нагахь санна, мухIажар лоручу Австри иза вагIахь, лоцур волуш ву.
"Берашна алименташ даха гIерта Магомадов, бераш кхаба гIора дац-кх цуьна. Соьга схьало, делахь, суна алименташ ца оьшу, сайн бераш айса хьалакхио лаьа суна. КIенташца телефонехула зIе хилийта а дуьхьал ву иза… Ненах а девлла бераш, кхачо йоллуш церан доладарх а. Магомадов хIинца доьазлагIа зуда ялош ву, суна хууш дац, уьш хьан кхиош бу", - дIахьедина Марковас.
2014-чу шарахь Нохчийчуьрчу Шелан кIоштан кхело ненан бакъонаш дIаехира Маркова Ольгера.
Дахначу шарахь Европерчу адамийн бакъонашкахула йолчу кхело бакъдира, Къилбаседа Кавказехь зударшца дискриминаци лелош хиларх берана тIехь доладарх кхелан гIуллакхашкахь.
