Оьрсийчохь тIаьххьарчу дийнахь-буса коронавирус карийна 23 эзар вахархочуьнца (аннекси йина ГIирма а чулору статистико). Уьнна дуьхьалоечу оперативан штабан хаамца, коронавирус яьржичхьана Оьрсийчохь иза хьакхаелла 3 379 103 стагах. Москвахь дийнахь-буса 4900 керлачу стагехь хааелла COVID-19, Петербургехь и терахь ду 3000 сов, Москван гонахарчу меттигашкахь – 1200 гергга, Нижний Новгородехь – 443, Ростов-махкахь – 395. Пандемин берриг муьрехь Оьрсийчохь уьнах велла 61 000 стаг, хаам баржийна тахана, Дечкен-беттан 9-чохь, оперативан штабо.
Индозин Iедало бинчу хаамца, шоьтан дийнахь хIорда чу "Сривиджая Эйрлайнз" авиакомпанин кема чудоьжначохь карийна цуьнан дакъош. Кема ирхдаьллачу пхоьалгIачу минотехь хаьдда цуьнца зIе. 62 стаг хилла кеманца, экипажах 12 а волуш. Дийна ца висина цхьа а. Джакартера Понтианаке (Малхбузера Калимантан провинци) доьдуш хилла кема. КIирандийнахь кеманах бисинчу орца кхайкхочу гIирсан сигналца билгалъяьлла бохам хилла меттиг, хаам бина Би-би-си копрорацино. Кема чудоьжначу метте таллама-орцан ницкъаш хьовсийна. Читать дальше...