Грузин кухнясын халыкара дип тә әйтергә була. Аларның шашлык, харчо, лобиоларын күп кенә ресторан-кафеларда әзерлиләр. Ә менә тавык яки күркә шулпасыннан, йомырка, аш серкәсе, он, суган салып пешерелгән чихиртманы, суган белән кыздырылган тавык итеннән булган чахохбилины, сырлы ватрушка хачапурины грузин кухнясының визит карточкасы, дип йөртәләр.
Грузиннар өстәлендә шәраб аерым урын алып тора. Халык биредә күпләп йөзем үстерә. Әмма шәраб ясау серләрен башкаларга ачып салырга бик атлыгып тормыйлар. Табын янында исергәнче шәраб эчү гадәтсезлек санала, шуңа да аны аз гына кулланалар. Ризык әзерләгәндә шәрабны да, йөзем согын да еш кулланалар. Грузиннар чәйне бик эчми, өстенлекне шәраб, йөзем согына бирә.
Бу халыкның өстәлендә ел әйләнәсе яшел тәмләткечләр күрергә була. Петрушка, укроп, кресс-салат, эстрагон, бөтнек, рәйхан, яшел суган һәм башка шундый үләннәрне ел әйләнәсе кулланалар. Яшел тәмләткечләр белән бергә редис, шалкан, помидор, кыяр, әче борычны күп ашыйлар.
Башка Кавказ халыкларыннан аермалы буларак, әйткәнебезчә, алар өстенлекне ит ризыкларына бирә. Дуңгыз (мужужи), сарык (чанахи), сыер (харчо) һәм кош-корт (чахохбили) итләрен берсе эченә икенчесен төреп тә әллә ниләр әзерлиләр. Бу вакытта ике ит арасына хуш исле тәмләткечләрдән кинҗә, рәйхан, эстрагон, бөтнек салалар, кызыл борыч сибәләр. Аны урамда, күмер өстендә әйләндерә-әйләндерә, берничә сәгать пешерәләр. Мондый итләрнең тышкы ягы күмергә әйләнергә мөмкин, уртасы әйтеп бетергесез тәмле, хуш исле була. Ә менә балык ризыкларына бу як халкы бик мөкиббән түгел.
Грузин кухнясында яшелчә, җиләк-җимештән дә төрле нигъмәтләр әзерлиләр. Алардан төрле соус, тәмләткечләр ясыйлар. Бу як халкы, күбесенчә, ногыт борчагы, баклажан, чөгендер, помидор, төрле кәбестәләргә өстенлек бирә. Шулай ук кычыткан, кырлы борчак, тырнак гөл һәм башка шундый кыргый үләннәрне дә аш әзерләгәндә кулланалар. Грузиннар өстәлендә чикләвекләрне дә күрергә була. Соус, тәмләткечләр әзерлиләр, итле ашларга, балык ризыкларына салалар, икмәк, печенье пешергәндә дә өстиләр.
Грузин кухнясын сырдан башка күз алдына китереп булмый. Башка халыклар кебек аны кабымлык буларак түгел, ә кайнар ашлар әзерләгәндә файдаланалар.