Оренбургта «Бердәм Этнокитап йорты» барлыкка килде. Әлеге китап фонды Х. Ямашев исемендәге шәһәр милли китапханәсе базасында тупланды.
Китап мәйданчыгының тантаналы ачылышы 10 февральдә узды. Бердәм әдәби киңлек булдыру китапханәнең 2022 елда гражданлык җәмгыятен үстерүгә грантлар конкурсында катнашуы аркасында мөмкин булды. «Бердәм Этнокитап йорты» проекты җиңүче булды һәм аны тормышка ашыру өчен 500 мең сум грант акчасын алды. Бу хакта Бөтендөнья татар конгрессы матбугат хезмәте хәбәр итә.
Проектның төп идеясе – үз тамырлары тарихы, төбәкнең милли-мәдәни мирасы белән кызыксынуны үстерү, диелә хәбәрдә.
Хәзерге вакытта «Бердәм Этнокитап йорты»нда Россиянең иң зур нәшриятларының 500дән артык китабы исәпләнә.