Rusiye Ukrayınağa qarşı büyük ücümi neticesinde silâsınıñ büyük qısmını ğayıp etti, dep bildirdi NATO memurı Reuters agentligine.
Onıñ aytqanına köre, Rusiye sanayısı Ğarpnıñ sanktsiyaları sebebinden bütün silâ ve silâ sistemalarını yapıp çıqaramay. Memur Rusiyege 300 biñ arbiyni seferber etmek içün ne qadar vaqıt kerek bilmey dep ayttı ve buña bir qaç ay kete bile, dep teklif etti.
Ukrayına Silâlı quvetleriniñ Baş ştabı malümatına köre, Rusiyeniñ büyük istilâsı başlağanından Rusiye 315 qanatlı raketanı coydı.
Rusiye yoq olğan tehnikası aqqında malümat bermey. Sentâbrniñ 21-nde soñki altı ay içinde ilk sefer Rusiye Ukrayınağa qarşı cenkte ölgen asker sayısını aydınlattı. Rusiye Mudafaa naziri Sergey Şoygu Ukrayınadaki cenkte 5937 Rusiye arbiyi öldi, dep bildirdi.
Büyük Britaniyanıñ Mudafaa naziri Ben Uollesniñ sentâbrniñ 5-nde bildirgenine köre, Ukrayınağa qarşı cenkte Rusiye ordusından 25 biñ kişi öldi. Onıñ aytqanına köre, yaralanğan, esir ve dezertir sayısı tahminen 80 biñ arbiy ola.
Cenk vaziyetinde zararlarnen bağlı malümatnı teşkermek imkânsız ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
