Кадр: YouTube Самарқанд вилояти Каттақўрғон туманида қабулига келган аёлга тегажоғлик қилган «мулла»га нисбатан 10 сутка маъмурий қамоқ жазоси тайинланди. Бу ҳақда Ички ишлар вазирлиги хабар бермоқда. Суд ҳужжатларида кўрсатилишича, қайнота келинининг соғлиғи ёмонлашгани учун уйга мулла чақирган. Келинни ўқиб қўйишини айтган шахс унинг қайнонасидан хонани тарк этиши кераклигини сўраган. Аёл билан ёлғиз қолган ушбу шахс аёлга қўл теккизиб, қучоқлаб, турли сўзлар билан шилқимлик қилган. Бундан ташқари, «мулла» аёлга араб тили мактабига бориши лозимлиги, ҳар куни кечқурун уйидагиларга билдирмаган ҳолда унинг уйига бориши кераклигини айтган. Шундан сўнг аёл бу шахс устидан ички ишлар органларига шикоят қилган. «Мулла» эса органга боришдан бош тортган. Суд жараёнида 47 ёшли шахс айбига иқрор бўлди. Унга нисбатан Маъмурий жавобгарлик тўғрисидаги кодекснинг тегишли моддаларига асосан 10 сутка маъмурий қамоқ ва 600 минг сўм жарима жазоси тайинланди. Маълумот учун, бу шахс аввал ҳам ичкилик ичиб, жамоат жойида тартиб бузгани учун жаримага тортилган.
