وسله والو طالبانو د کندز پر خان اباد ولسوالۍ تېره شپه برید وکړ. یوې سرچېنې چې نه یې غوښتل نوم یې واخېستل شي، ازادي راډیو ته وویل چې د جګړې لمن د ښار تر کوڅو رسیدلې او لا هم روانه ده.
د کندز د والي ویاند عصمت اله مرادي راډیو ته وویل چې خان اباد ته تازه دمي ځواکونه رسیدلي دي او ډېر ژر به هلته په امنیتي وضعیت کې بدلون راشي.
د کندز امنیه قومانداني په خپره کړې خبرپانه کې لیکي، تر اوسه په جګړه کې د طالبانو د سرې قطعې د قوماندان سید جان مشهور په سجاد په ګډون د دوی پنځلس تنه وژل شوي دي او د افغان پوځیانو یو تن وژل شوی او درې تنه یې ټپیان شوې دي.
وسله والو طالبانو تر اوسه په دې اړه څه نه دي ویلي.