(Казан, 29 март, «Татар-информ», Гөлүзә Ибраһимова). Бакчачылар авыл хуҗалыгы предприятиеләренә караганда бер квадрат метрдан күбрәк продукция ала.
«Бакчачы тормыш рәвешенә ихтыяҗ зур. Ул ял гына түгел, ә хезмәт, тәрбия, керем урыны булып тора. Бер квадрат метр мәйданга санаганда 28 мең гектар мәйданы булган 400 меңгә якын җир участогы бик күп продукция җитештерә. Бер авыл хуҗалыгы товар җитештерүчесе дә ул күләмдә продукция җитештерми», — дип сөйләде Татарстан Дәүләт Советы Рәисе урынбасары Марат Әхмәтов.
РФ Дәүләт Думасы депутаты Айрат Фәррахов үткәргән туры эфир вакытында Әхмәтов бакчачылык ширкәтләренә ярдәм итүне дәвам итәргә кирәк булуны ассызыклады. Марат Әхмәтов фикеренчә, бакчачыларның проблемаларын хәл итү нәтиҗәле булсын өчен җирле муниципаль хакимиятнең ширкәтләр белән тыгыз элемтәдә торуы кирәк.
