ԱՄՆ Կալիֆոռնիա նահանգի պատմության մեջ ամենախոշոր անտառային հրդեհները սպառնում են ընդլայնել իրենց մակերեսը, հայտնում է Daily Mail-ը՝ հիշեցնելով, որ հրդեհները մոլեգնում են հուլիսի կեսերից:
Նահանգի հյուսիսային հատվածում կրակի տարածման դեմ պայքարող հազարավոր հրշեջներ ահազանգում են, որ չոր եղանակն ու քամին նպաստում են հրդեհի տարածքի ընդլայնմանը:
Պարբերականը մանրամասնում է, որ մեկ ամսից էլ քիչ ժամանակահատվածում հրդեհների հետևանքով զոհվել է 6 հրշեջ, ինչպես նաև՝ 6 բնակիչ: Ինչ վերաբերում է տարհանվածներին, ապա նրանք 38.000-ից ավելի են:
Վերջին տվյալներով՝ անտառային հրդեհների ընդհանուր մակերեսը մոտ 116.000 հա է:
Ավելի վաղ ԱՄՆ նախագահ Դոնալդ Թրամփը Կալիֆոռնիայի հյուսիսում մոլեգնող անտառային հրդեհները «խոշոր աղետ» էր հայտարարել և հրահանգել էր դաշնային օգնության ֆոնդից միջոցներ հատկացնել տուժած շրջաններին:
