Պլաստիկ պատուհանների և դռների արտադրություն իրականացնող «ՄՄՄ» ընկերության նախկին սեփականատերերն ամիսներ շարունակ աշխատավարձեր չեն վճարել աշխատակիցներին: Ընկերության մոտ 300 աշխատողի չվճարված աշխատավարձի ընդհանուր գումարը կազմում է 74 մլն դրամ:
«2015 թ.-ի աշխատավարձը սառեցրել էին իրենք, ասել են` հետո կտանք, այդտեղից է հիմնական պարտքը գալիս: Հետագայում 2017 թ.-ի սեպտեմբեր և հոկտեմբեր ամիսներին աշխատավարձեր չեն տրվել: Բայց «ՄՄՄ» ընկերության նախկին տնօրեններ Մուշեղ և Մհեր Միրիջանյանները հայտարարում են, որ այդ գումարը պարտք չեն»,- հայտնեց ընկերության աշխատակից Վաչագան Հարությունյանը:
Աշխատակիցները հավաքվել են կառավարության շենքի դիմաց և խնդրում են, որպեսզի վարչապետն ընդունի իրենց. «Մենք ընդամենը խնդրում ենք, որ մեր աշխատավարձերը վճարեն»,- ասացին աշխատակիցները:
«Եթե պաշտոնապես մենք դիմենք և պահանջենք մեր գումարը, կստանանք շատ քիչ գումար: Պայմանագրային գումար ենք ունեցել՝ հաստատված, ստորագրված, ցածր գումարներ են եղել: Իսկ մեր աշխատավարձերը փոխադարձ համաձայնությամբ բավականին բարձր են եղել»,- հայտնեց Վաչագան Հարությունյանը:
Բողոքի ակցիա իրականացնող «ՄՄՄ» ընկերության աշխատակիցներին մոտեցավ ՀՀ վարչապետի օգնական Նաիրի Սարգսյանը: Վերջինս կոնտակտներ վերցրեց աշխատակիցներից և խոստացավ խնդրին ծանոթանալուց հետո կապ հաստատել նրանց հետ:
