Գերմանիան դադարեցնում է Leopard 2 տեսակի տանկերի վաճառքը Թուրքիային, պատճառը թուրքական ԶՈւ-ի կողմից Սիրիայի Աֆրին շրջանում իրականացվող ռազմական գործողություններն են, այս մասին գրում է թուրքական diken.com.tr կայքը:
Աղբյուրը նշում է, որ Գերմանիայի խիստ մտահոգում է Աֆրինում խաղաղ բնակչության վրա հարձակումների հավանականության փաստը, ինչի մասին ավելի վաղ Թուրքիայի արտգործնախարար Մևլյութ Չավուշօղլուին էր տեղեկացրել Գերմանիայի արտգործնախարար Զիգմար Գաբրիելը:
Հայտնի է, որ տանկերի մատակարարման դադարեցման մասին որոշումը կայացվել է Գաբրիելի և Գերմանիայի կանցլեր Անգելա Մերկելի կողմից:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որն ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ: