ՀՀ ՊՆ տեղեկատվության և հասարակայնության հետ կապերի վարչության պետի Գևորգ Ալթունյանը Tert.am-ի հետ զրույցում հայտնեց, որ ստացել են հասարակական գործիչ, Արցախյան ազատամարտի մասնակից Սարգիս Հացպանյանին «Եռաբլուր» պանթեոնում հուղարկավորելու համար նախարարությանն ուղղված դիմումը, որը քննարկվում է: Նա նշեց, որ ներկայացված փաստաթղթերում մարտական ուղու վերաբերյալ հիմնավորումներ չկան: «Հուղարկավորությունը «Եռաբլուրում» կազմակերպելու համար որոշ ընթացակարգեր կան, որ անձը որոշակի մարտակի ուղի անցած լինի: Այս պարագայում մարտական ուղու հետ կապված հիմնավորումներ դեռևս չկան»,-ասաց նա և նշեց, որ մարտական ուղու մասին տվյալներ ներկայացնում են հրամանատարները:
Նշենք, որ «Change.org» կայքում ՀՀ պաշտպանության նախարարին ուղղված առցանց ստորագրահավաք էր մեկնարկել՝ Սարգիս Հացպանյանին Եռաբլուրում հուղարկավորելու պահանջով:
Ինչ վերաբերում է Հացպանյանի մարտական ուղու` բոլորին հայտնի լինելուն, ապա նա ասաց, որ դա ընթացակարգ է, որը բոլոր դեպքերում գործում է: «Այսինքն` որոշակի դիմում, փաստաթղթեր պետք է լինեն, որոնք հաստատում են, որ անձը մարտական որոշակի ուղի է անցել: Բոլոր հիմքերը պետք է լինեն, որ նոր որոշում կայացվի»,-ասաց նա:
Խոսելով այդ հարցի շուրջ նախարարության նախնական վերաբերմունքի մասին, Գևորգ Ալթունյանը նշեց. «Նախարարության վերաբերմունքը որևէ անձի վերաբերմունք չէ, դա պաշտոնական դիրքորոշում է, որը հիմնված է որոշակի ընթացակարգերի վրա, եթե հիմնավորումների մի մասը բացակայում է, նախարարությունը չի կարող որոշում կայացնել»:
