Ամերիկյան roadsandkingdoms.com կայքն ուշագրավ անդրադարձ է ներկայացրել Երուսաղեմի հայկական թաղամասի մասին, որը գրվել է Սուրբ հող կատարած այցելությունից ստացած տպավորությունների հիման վրա:
Հեղինակն անդրադարձը սկսում է հայ հոգևորականների կողմից Քրիստոսի գերեզմանը մաքրելու արարողության նկարագրությամբ:
«Քահանաների համար սա սովորություն է, մինչդեռ ուխտավորները դա անում էին հիացմունքով ու արցունքներն աչքերին: Նրանց համար անբացատրելի առանձնահատուկ պահ էր մաքրել այն եկեղեցու մի հատվածը, որտեղ ըստ ավանդության թաղվել է Քրիստոսը»,-սկսում է հեղինակը՝ անմիջապես անցում կատարելով Երուսաղեմի հայ համայնքին:
Նա նկատում է, որ հայերն ուղղափառ հույների ու կաթոլիկների հետ ղեկավարում են Երուսաղեմում, Բեթղեհեմում ու Իսրայելի այլ հատվածներում գտնվող քրիստոնական սրբավայրերի մի մասը, օրինակ՝ Սուրբ Հարության տաճարը, Սուրբ Հակոբյանց վանքը, Սուրբ Ծննդյան տաճարը, Մարիամ Աստվածածնի գերեզմանը:
«Հայերը Երուսաղում են ապրել դարեր շարունակ: Ի տարբերություն աշխարհի բազմաթիվ այլ վայրերի՝ նրանք այստեղ են հիմնավորվել Հայոց ցեղասպանությունից շատ առաջ: Պատմական տվյալների համաձայն՝ նրանք սկսել են այստեղ ժամանել 4-րդ դարում՝ քրիստոնեությունը որպես պետական կրոն ընդունելուց հետո: Այսօր հայկական թաղամասը Երուսաղեմի Հին քաղաքի 1/6-րդ մասն է: Այստեղ ապրում է 700-1.000 հայ, սակայն համայնքի ապագայի վերաբերյալ մտավախություններ կան: Երուսաղեմում շարունակվող անհանգստությունները, զուգակցվելով հայերի նկատմամբ ոչ բարյացակամ տրամադրվածություն ունենալու համընդհանուր զգացումի հետ, վտանգի տակ են դրել ապագայի հարցը»,-նշել է հեղինակը:
Այնուհանդերձ՝ նա վստահություն է հայտնել առ այն, որ քրիստոնյա ուխտավորները՝ այդ թվում նաև հայերը, կշարունակեն այցելել Երուսաղեմի սրբավայրերը, քանի դեռ հավատը կապրի նրանց մեջ:
