Декабрьдә аномаль җылы һава торышы көтелә
Декабрьдә аномаль җылы һава торышы көтелә дип хәбәр итә РИА Новости Гидрометеорология үзәге җитәкчесе вазифаларын башкаручы Роман Вильфандка сылтама белән.
«Россиянең 40 процент территориясендә температура нормадагыдан югары булачак. Бу Төньяк-Көнбатыш, Идел буе, Үзәк округның көнбатышы, Көнбатыш Себер, Урта Себернең көнбатышы», — дигән ул.
Вильфанд әйтүенчә, җылы һава торышы Санкт-Петербург, Тверь, Вологда, Псков, Мәскәү, Казан, Самара, Пермь, Екатеринбург, Чиләбе, Омск, Томск, Новосибирск, Барнаул шәһәрләрендә, Таймыр һәм Ямалда көтелә.
Россиянең көнчыгышында һәм көньягында температра күпьеллык нормалар тирәсендә булачак.
«Бу һәрвакыт җылы булачак дигән сүз түгел. Җепшек көннәр дә, салкыннар да булачак. Температура үзгәреп торачак», — ди метеоролог.
Вильфанд әйтүенчә, явым-төшем дә тигез яумаячак. Төньяк-Кавказда, Үзәк округта, урта һәм түбән Иделдә, көньяк Уралда аз булыр дип көтелә.
Барнаул, Кемерова, Томск, Красноярск, Братск, Иркутскта, Көнбатыш Себер, Ямал, Таймыр, Якутия һәм Камчаткада кар күп булачак. Калган җирләрдә, шул исәптән Мәскәүдә явым-төшемнәр күләме нормада булачак.